<p><strong>मुंबई :</strong> <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a>ाच्या कानाकोपऱ्यात <a href="https://marathi.abplive.com/topic/dahihandi">दहीहंडी (Dahihandi)</a> उत्सावाची धूम पाहायला मिळत असून पारंपरीक पद्धतीने ढोला-ताशांच्या वाद्यात आणि गोविंदांच्या उत्साहात जल्लोष पाहायला मिळत आहे. मुंबई, ठाणे, नवी मुंबई, वसई विरारसह अनेक भागात सेलिब्रिटींसह जंगी दहीहंडी उत्सव दिसून येतो. दहीहंडी उत्सव पाहायला नागरिकांनी गर्दी केली असून गोविंदांचे थरावर थर चढत आहेत. 9 ते 10 थरांची सलामी काही ठिकाणी गोविंदांकडून देण्यात आली आहे. मात्र, मालाडच्या मालवणी रोडवरील एकता वेल्फेअर सोसायटीत ही मन हेलावणारी घटना घडली. <a href="https://marathi.abplive.com/topic/mumbai">मालवणी (Mumbai)</a> येथे दहीहंडीच्या कार्यक्रमादरम्यान भिंतीचा कॉलम कोसळून 7 वर्षीय मुलाचा मृत्यू झाल्याची दुर्दैवी घटना घडली. </p>
<p>मालाड पश्चिमेकडील मालवणी परिसरात दहीहंडी फोडताना विटांचा कॉलम कोसळून 7 वर्षीय मुलाचा दुर्दैवी मृत्यू झाल्याची दुर्घटना आज शनिवारी दुपारी 3 वाजताच्या सुमारास घडली. मिळालेल्या माहितीनुसार, चिकुवाडी, मालवणी, मार्वे रोड येथील एकता वेल्फेअर सोसायटीतील रूम क्रमांक 23 जवळ स्थानिक पातळीवर दहीहंडीचा उत्सव सुरू होता. काही मुले स्वतःहून दहीहंडी फोडत होती, यासाठी दोरी एका झाडाला तसेच तळमजल्यावरील बांधकामाच्या विटांच्या कॉलमला बांधण्यात आली होती. दहीहंडी फोडण्याच्या प्रयत्नादरम्यान अचानक विटांचा कॉलम कोसळला आणि त्याखाली 7 वर्षीय रुद्र कदम हा मुलगा अडकला. या दुर्घटनेत त्याच्या डोक्याला गंभीर दुखापत झाली. या घटनेनंतर रुद्रला तातडीने मालवणी जनरल हॉस्पिटलमध्ये उपचारासाठी नेण्यात आले. मात्र, रुग्णालयातील माहितीनुसार डॉक्टरांनी रुद्रला दाखल करण्यापूर्वीच मृत घोषित केले.</p>
<p>दरम्यान, घटनेची माहिती मिळताच वॉर्ड कंट्रोल रूम, पालिका कर्मचारी आणि पोलिसांनी घटनास्थळी धाव घेतली. या घटनेबाबत पुढील कार्यवाही सुरू आहे. मालवणीत दहीहंडीच्या उत्सवादरम्यान घडलेल्या या दुर्घटनेमुळे परिसरात हळहळ व्यक्त होत आहे. सदर घटना अत्यंत दुर्दैवी असून, उत्सवादरम्यान सुरक्षिततेच्या नियमांचे पालन करणे आणि कोणत्याही धोकादायक संरचनेचा किंवा असुरक्षित पद्धतीचा वापर न करणे अत्यावश्यक असल्याची चर्चा होत आहे. घटनेबाबत पुढील आवश्यक कायदेशीर व प्रशासकीय कार्यवाही संबंधित यंत्रणांकडून करण्यात येत आहे.</p>
<h2>हेही वाचा</h2>
<p class="article-pg-title"><a href="https://marathi.abplive.com/photo-gallery/news/politics-manoj-jarange-patil-maratha-protesters-turn-aggressive-in-solapur-gopichand-padalkar-convoy-blocked-mla-says-i-have-my-support-1438080">सोलापुरात मराठा आंदोलक आक्रमक; गोपीचंद पडळकरांचा ताफा अडवला, आमदार म्हणाले, माझा पाठिंबा पण...</a></p>
1 month ago
5 
