<p style="text-align: justify;"><strong>मुंबई :</strong> मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी मराठा समाजाला न्याय दिला आहे, परंतु जे लोक मराठा समाजाला सातत्याने देत आहेत त्यांच्यावर टीका करण्याची नवी पद्धत सुरू आहे, असं राज्याचे मंत्री उदय सामंत म्हणाले. मनोज जरांगे यांच्या 15 पैकी 12 मागण्या मान्य केल्या असून त्यांनी गणेशोत्सवामध्ये मुंबईमध्ये येऊन अडचणी निर्माण करू नये, असं आवाहन उदय सामंत यांनी केलं. </p>
<p style="text-align: justify;">मनोज जरांगे यांच्या अंतरवाली सराटीमध्ये सुरू असलेल्या उपोषणाचा आज अकरावा दिवस आहे. मराठा समाजाच्या मागण्यांसंदर्भात पुढील निर्णय काय घ्यायचा, पुढची दिशा काय असावी यासाठी जरांगे यांनी 12 सप्टेंबर रोजी अंतरावाली सराटीमध्ये जमण्याचं आवाहन मराठा समाजाला केलं आहे. तर दुसरीकडे, मराठा समाजाच्या मागण्यांवर कायदेशीर तोडगा काढण्यासाठी <a title="छत्रपती संभाजीनगर" href="https://marathi.abplive.com/news/chhatrapati-sambhaji-nagar" data-type="interlinkingkeywords">छत्रपती संभाजीनगर</a>च्या आयुक्तालयामध्ये बैठक आयोजित करण्यात आली आहे. </p>
<h2 style="text-align: justify;"><strong>उदय सामंत काय म्हणाले?</strong></h2>
<p style="text-align: justify;">मनोज जरांगे यांनी त्यांचे उपोषण मागे घ्यावे, असं आवाहन मंत्री उदय सामंत यांनी केलं. ते म्हणाले की, "ज्यांनी मराठा समाजाला कधीही न्याय दिला नाही त्यांचे कौतुक केलं जात आहे आणि जे लोक समाजाला सातत्याने देत आहेत त्यांच्यावरच टीका करण्याची नवी पद्धत सुरू आहे. देवेंद्र फडणवीसांनी आणि एकनाथ शिंदे यांनी सातत्याने मराठा समाजाला दिलं आहे. परंतु त्यांच्यासह मंत्र्यांवर सातत्याने टीका करणे हे काही योग्य नाही."</p>
<p style="text-align: justify;">मनोज जरांगे यांनी ज्या 15 मागण्या केल्या आहे त्यापैकी 12 मागण्या सरकारने मान्य केल्या आहेत. उर्वरित तीन मागण्यांवर कायदेशीर मार्गाने तोडगा काढणे सुरू आहे, असं उदय सामंत म्हणाले. एकनाथ शिंदे यांनी छत्रपती शिवाजी महाराजांची शपथ घेऊन मराठा समाजाला कसं आरक्षण दिलं जातं हे सर्वांना दाखवलं आहे. 2014 पासून <a title="देवेंद्र फडणवीस" href="https://marathi.abplive.com/topic/devendra-fadnavis" data-type="interlinkingkeywords">देवेंद्र फडणवीस</a>ांनी मराठा समाजाला न्याय देण्याचं काम केलंय. त्यामुळे जरांगे पाटील यांनी त्यांचे उपोषण मागे घ्यावे अशी मागणी आम्ही सातत्याने करत आहोत, असं उदय सामंत म्हणाले. </p>
<p style="text-align: justify;">गणेशोत्सव हा हिंदूंचा मोठा सण आहे. <a title="मुंबई" href="https://marathi.abplive.com/news/mumbai" data-type="interlinkingkeywords">मुंबई</a>मध्ये तो मोठ्या प्रमाणात साजरा केला जातो. जगभरातील लोकांचे लक्ष त्याकडे असते. या सणामध्ये अडचणी निर्माण होतील असं काही जरांगे पाटील यांनी करू नयेत, असं आवाहन उदय सामंत यांनी केलं. </p>
<p style="text-align: justify;">भाजपचे आमदार प्रसाद लाड म्हणाले की, "मराठा समाजाच्या ज्या मागण्यांवर जरांगे पाटील यांचे समाधान होत नाही त्यावर आम्ही चर्चा करत आहोत. मनोज जरांगे पाटील हे मराठा समाजासाठी लढत आहेत, त्या समाजाचे प्रश्न सुटत असतील तर त्यांनी उपोषण मागे घ्यावे."</p>
<p style="text-align: justify;"><strong>ही बातमी वाचा: </strong></p>
<ul>
<li style="text-align: justify;"><a href="https://marathi.abplive.com/news/politics/uddhav-thackeray-strongly-criticized-eknath-shinde-devendra-fadnavis-over-manoj-jarange-patil-maratha-reservation-mpsc-exam-paper-leak-student-protests-maharashtra-politics-1438445"><strong>Uddhav Thackeray : तेव्हा गुलालाने दाढी लाल करुन घेणारे आता कुठे गेले? उद्धव ठाकरेंचा मराठा आरक्षणावरुन एकनाथ शिंदेंना टोला</strong></a></li>
</ul>
1 month ago
4 
