<p><a title="मुंबई" href="https://marathi.abplive.com/news/mumbai" data-type="interlinkingkeywords">मुंबई</a> : राज्यभरात गाजलेल्या MPSC परीक्षेच्या (MPSC) पेपरफुटीवरुन आता कारवाईला वेग आला आहे. या प्रकरणात अनेक धक्कादायक खुलासे समोर येत आहेत. एमपीएससी (MPSC Paper Leak Case) औषध निरीक्षक पेपरफुटी प्रकरणी नंदुरबार येथून ऋतुजा पाटीलला देखील अटक करण्यात आली होती. पोलिसांनी नंदुरबारमध्ये (Nandurbar) ऋतुजाला ताब्यात घेऊन चौकशी केल्यानंतर तिला अटक करण्यात आली. या प्रकरणाच्या तपासामध्ये काही महत्त्वाच्या गोष्टी समोर आल्या आहेत. 270 पानांच्या व्हॉट्सॲपवरील (WhatsApp) चॅट्समधून तपासाला नवी दिशा प्राप्त झाली आहे. MPSC ड्रग इन्स्पेक्टर पेपरफुटी प्रकरणात आरोपी ऋतुजा पाटीलचा मोबाईल उल्हास नदीत फेकल्याचा दावा करण्यात आला आहे. मात्र, सहआरोपी लोकेश उर्फ गौरव पाटीलच्या मोबाईलमधून ऋतुजा आणि गौरव यांच्यातील तब्बल 270 पानांच्या WhatsApp चॅट्स क्राईम ब्रँचकडून हस्तगत करण्यात आले आहेत.(MPSC Paper Leak Case)</p>
<h2><strong>MPSC Paper Leak Case : पेपरसाठी 5 लाखांची मागणी झाल्याचाही चॅटमध्ये उल्लेख </strong></h2>
<p>22 मार्च 2026 रोजीच्या MPSC परीक्षेपूर्वी प्रश्नपत्रिका/प्रश्नसंचाच्या कथित देवाणघेवाणीचा क्रम चॅट्सच्या माध्यमातून तपासले जात आहे. 20 मार्चच्या चॅटमध्ये ऋतुजाने एका प्रश्नसंचातील प्रश्न परीक्षेत येऊ शकतात, तसेच इतर 10 प्रश्न मुद्दाम चुकीचे सोडवावे लागतील, असा उल्लेख केल्याचा दावा करण्यात आलेला आहे. 22 मार्चच्या चॅटमध्ये दिलेल्या प्रश्नांपैकी 78 प्रश्न परीक्षेत आल्याचा ऋतुजाचा कथित दावा या चॅटमधून समोर आला आहे. आणखी 13 प्रश्न सोडवल्याने एकूण 91 प्रश्न सोडवल्याचे चॅटमध्ये म्हटल्याचा तपास यंत्रणेचा दावा आहे. चॅट्समध्ये वॉन्टेड आरोपी मयूर ठाकरे याचाही उल्लेख करण्यात आल्याचं समोर आलं आहे; त्याच्या भूमिकेचा देखील तपास सुरू आहे. ऋतुजाच्या वडिलांनी मयूर ठाकरेला प्रकरणाची माहिती कुणालाही, अगदी घरच्यांनाही न सांगण्यास सांगितल्याचा चॅटमध्ये उल्लेख करण्यात आलेला आहे. पेपरसाठी 5 लाखांची मागणी झाल्याचाही चॅटमध्ये उल्लेख आहे; दुसऱ्या दिवसापर्यंत रक्कम जमवण्याबाबत चर्चा झाल्याचं चॅटमधून समोर आलं आहे. ऋतुजाचा मोबाईल अद्याप सापडलेला नसल्याने गौरवच्या मोबाईलमधील चॅट्स महत्त्वाचा डिजिटल पुरावा ठरत आहेत. या पेपरफुटीत इतर कोणाचा सहभागी आहे का?, पेपरफुटीचा नेमका प्रवाह आणि मयूर ठाकरेची भूमिका याचा क्राईम ब्रँचकडून तपास सुरू आहे, पुढील तपासात देखील अनेक धक्कादायक खुलासे समोर येण्याची शक्यता आहे.(MPSC Paper Leak Case)</p>
<h2><strong>MPSC Paper Leak Case : ऋतुजा पाटील कोर्टात भावूक</strong></h2>
<p>नीट पेपरफुटीनंतर राज्यभरात गाजलेल्या MPSC परीक्षेच्या (MPSC) पेपरफुटीवरुन आता कारवाईला वेग आला आहे. याप्रकरणी गुन्हे शाखेने अगोदरच तीन अधिकाऱ्यांसह 7 जणांना अटक केली होती. त्यानंतर, एमपीएससी औषध निरीक्षक पेपरफुटी प्रकरणी नंदुरबार येथून ऋतुजा पाटीलला देखील अटक करण्यात आली. पोलिसांनी नंदुरबारमध्ये (Nandurbar) ऋतुजाला ताब्यात घेऊन चौकशी केल्यानंतर तिला अटक करण्यात आली. त्यानंतर, 2 सप्टेंबर रोजी कोर्टात (Court) हजर केले असता ऋतुजाला तीन दिवसांची पोलीस कोठडी सुनावण्यात आली आहे. तर, उर्वरित आरोपींना पाच दिवसांची पोलीस कोठडी देण्यात आली आहे. </p>
<p>एमपीएससी औषध निरीक्षक पेपरफुटी प्रकरणी अटक करण्यात आलेल्या सर्वच सात आरोपींना सत्र न्यायालयात हजर करण्यात आलं. यावेळी, सात दिवसांच्या पोलीस कोठडीची मागणी पोलिसांकडून करण्यात आली होती. तर, पोलिसांनी अटक केल्यानंतर ऋतुजा पाटीलला 2 सप्टेंबर रोजी न्यायालयात हजर केले असता ऋतुजा कोर्टात भावूक झाल्याचं दिसून आलं. याप्रकरणातील आरोपी असलेला एमपीएससीचा अधिकारी विश्वेशर नकाते याने गुन्ह्यात वापरलेला लॅपटॉप खाडीत फेकला होता. पुरावा नष्ट करण्याच्या उद्देशाने आरोपीने लॅपटॉप खाडीत फेकल्याची माहिती तपासातून समोर आली आहे. याच लॅपटॉपवर नकातेने सगळे 294 प्रश्न आणि त्यांच्या पर्यायाची नोंद केली असल्याचा दावा पोलिसांनी केला आहे.</p>
<p>पोलिसानी खाडीत फेकलेला हा लॅपटॉप शोधला आणि त्यातील डाटा रिकव्हर करण्याचा प्रयत्न सुरू असल्याची माहिती 2 सप्टेंबर रोजी कोर्टात दिली. नंदुरबारमधील कौटिल्या क्लासेसचा संचालक आणि आरोपी प्रवीण पाटीलच्या घरातून आर्थिक नोंदीचे दस्तावेजही सापडले आहेत. मात्र, अद्यापही काही तपास बाकी असल्याने पोलिसांनी आरोपींच्या 7 दिवस पोलीस कोठडीची मागणी केली होती. तपास प्रगतीथावर असून आरोपी आणि ऋतुजा पाटीलची समोरासमोर चौकशी करणे गरजेचे असल्याचे मत पोलिसांचे आहे. आरोपी तपासात सहकार्य करत नाहीत, उडवाउडवीची उत्तरे देत असल्याचेही पोलिसांनी कोर्टात सांगितले. त्यानंतर, न्यायालयाने आरोपी ऋतुजाला 3 दिवसांची तर उर्वरीत आरोपींना 5 दिवसांची पोलीस कोठडी सुनावली.</p>
<p><iframe title="YouTube video player" src="https://www.youtube.com/embed/a5B0FhXuLoY?si=kCvEYN0Pvk1ewhaT" width="560" height="315" frameborder="0" allowfullscreen="allowfullscreen"></iframe></p>
1 month ago
5 
