<p>Krishnaraaj Mahadik and MNS: पंतप्रधान नरेंद्र मोदींचा अपमान केल्याचा आरोप करत मंगळवारी राज ठाकरे यांच्या घराबाहेर आंदोलनासाठी गेलेल्या भाजप युवा मोर्चाचे प्रदेशाध्यक्ष कृष्णराज महाडिक (Krishnaraaj Mahadik) यांना सध्या सोशल मीडियावर विरोधकांकडून प्रचंड ट्रोलिंगचा सामना करावा लागत आहे. कृष्णराज महाडिक यांच्या नेतृत्त्वाखाली भाजयुमोचे कार्यकर्ते राज ठाकरे (Raj Thackeray) यांच्या घराबाहेर आंदोलन करणार होते. मात्र, राज ठाकरेंच्या घराबाहेर मनसैनिक अभेद्य भिंतीसारखे उभे ठाकल्याने भाजयुमो (BJP Yuva Morcha) आणि कृष्णराज महाडिक यांची राज ठाकरेंच्या घराबाहेर आंदोलन करण्याची मोहीम फसली होती. राज ठाकरे यांचे घरच काय तर भाजयुमोला शिवाजी पार्कच्या परिसरातही पोहोचता आले नव्हते. याउलट मनसेने भाजयुमोचे कार्यकर्ते जमलेल्या माहीम परिसरात जाऊन एकच गदारोळ उडवून दिला होता. या सगळ्या प्रकारानंतर कृष्णराज महाडिक कालच कोल्हापूरला परतले होते. यानंतर भाजप प्रदेशाध्यक्ष रवींद्र चव्हाण यांनीही भाजयुमोच्या कार्यपद्धतीवर नाराजी व्यक्त केली होती. या सगळ्या घडामोडींनंतर कृष्णराज महाडिक यांनी <a title="कोल्हापूर" href="https://marathi.abplive.com/kolhapur" data-type="interlinkingkeywords">कोल्हापूर</a>मधून प्रसारमाध्यमांशी संवाद साधत <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a> नवनिर्माण सेनेला पुन्हा एकदा निर्वाणीचा इशारा दिला आहे. (Maharashtra Politics news)</p>
<p><br />काल संपूर्ण आंदोलनात जे प्रकरण घडलं त्याचे सीसीटीव्ही फुटेज आम्ही बघितले. भाजयुमोचे कार्यकर्ते शिस्तबद्ध पद्धतीने माहीमच्या चौकात जमले होते. मनसेचे गुंड नव्हे चोर तिथे आले होते. पाठीमागाच्या बाजूने येऊन मनसेच्या चोरांनी आमच्या काही कार्यकर्त्यांना धक्काबुक्कीचा प्रयत्न केला. आमच्या कार्यकर्त्यांनी मनसेच्या चोरांना जशास तसं उत्तर दिलं आहे, हे सीसीटीव्हीत दिसत आहे. इथून पुढे भाजयुमोच्या कुठल्याही संकल्पनेत अशा पद्धतीचं प्रकरण घडवण्याचा प्रयत्न केला तरी त्याला जशास तसे उत्तर दिले जाईल, असा सज्जड दम कृष्णराज महाडिक यांनी मनसेला दिला.</p>
<p>मी सोशल मीडियावरील ट्रोलिंगकडे फारसे लक्ष देत नाही. मी देशाच्या पंतप्रधान पदाचा जो अपमान झाला त्याविरोधात आवाज उठवला होता. अमित ठाकरे यांनी फक्त पंतप्रधानपद नव्हे तर देशाच्या संविधानाचा अपमान केला आहे. पुण्यात जो प्रकार घडला तो दुर्दैवी आणि विनोदी होता. तुम्हाला बेसिक प्रोटोकॉल माहिती नाही. यामधून युवा पिढीत चुकीचा संदेश जातो, असेही कृष्णराज महाडिक यांनी म्हटले.</p>
<p><strong>Krishnaraaj Mahadik: मोदींना बोलल्यामुळे तरुणांना राग आला अन् कालचं आंदोलन झालं: कृष्णराज महाडिक</strong></p>
<p>रवींद्र चव्हाण यांनी भाजप युवा मोर्चाच्या कार्यपद्धतीवर नाराजी व्यक्त केली होती. यावर प्रतिक्रिया देताना कृष्णराज महाडिक यांनी म्हटले की, युवा मोर्चा इथून पुढे खूप चांगल्या पद्धतीने काम करताना दिसेल. रवींद्र चव्हाण यांच्या नेतृत्त्वात आम्ही काम करतो. आम्ही रवींद्र चव्हाणांच्या प्रत्येक निर्णयाचे पालन करत आलो आहोत, इथून पुढेही करत राहू. एखादी व्यक्ती जिने संपूर्ण आयुष्य देशाच्या प्रगतीतसाठी आणि लोकहितासाठी समर्पित केलंय, अशा व्यक्तींचा अपमान होतो तेव्हा साहजिक प्रत्येक तरुणाच्या मनात राग निर्माण होऊ शकतो, त्यासाठी आमचे कार्यकर्ते काल रस्त्यावर उतरले होते. युवा मोर्चा अशी विंग आहे, जे वाटतयं ते आम्ही व्यक्त करुन मोकळे होतो, असे कृष्णराज महाडिक यांनी म्हटले.</p>
<p><iframe title="YouTube video player" src="https://www.youtube.com/embed/Awo4TjHFTtU?si=Edn6oEurAkonpU1R" width="560" height="315" frameborder="0" allowfullscreen="allowfullscreen"></iframe></p>
<p><strong>आणखी वाचा</strong></p>
<p class="abp-article-title"><strong><a href="https://marathi.abplive.com/news/politics/bjp-ravindra-chavan-slams-bjym-krishnaraj-mahadik-over-agitation-against-mns-chief-raj-thackeray-and-amit-thackeray-in-mumbai-marathi-news-1437662">BJP vs MNS: राज ठाकरेंच्या मनसेशी पंगा घेणाऱ्या भाजयुमोच्या कृष्णराज मडाडिकांना प्रदेशाध्यक्षांच्या कानपिचक्या, म्हणाले...</a></strong></p>
1 month ago
4 
