<p><strong>जालना :</strong> मराठा आंदोलक <a href="https://marathi.abplive.com/topic/manoj-jarange">मनोज जरांगे पाटील (Manoj jarange)</a> यांनी 500 कोटींच्या ऑडिओ क्लिपचे जाहीरपणे प्रसारण केल्यानंतर राजकीय वर्तुळात खळबळ उडाली असून भाजप-<a href="https://marathi.abplive.com/topic/shivsena">शिवसेना (Shivsena)</a> आमने सामने आले आहेत. त्यावरुन जरांगे पाटील यांनाही लक्ष्य केलं जात आहे. तर, दुसरीकडे हा खूप मोठा विषय आहे, त्यामुळे जीव धोक्यात घालून मी हे सगळं समोर आणल्याचं जरांगे पाटील यांच्याकडून सांगण्यात येत आहे. त्यातच, हे खूप मोठं नेटवर्क, माझ्या घरावरती हल्ला करू शकतेत, असे म्हणत जरांगे पाटलांनी भीती व्यक्त केलीय. </p>
<p>मी दिलेली ऑडिओ क्लिप माझ्या अगोदर व्हायरल झालेली आहे, रामदास कदम यांनीच ती क्लिप व्हायरल केली. त्यामुळे, रामदास कदम यांची चौकशी झाली पाहिजे, त्यांच्याजवळच सगळं आहे, असे म्हणत मनोज जरांगे पाटील यांनी पुन्हा एकदा रामदास कदमांना लक्ष्य केलं. मी क्लिप दिल्यावर त्या सोर्सची सगळी हमी आणि जबाबदारी मुख्यमंत्री फडणवीस आणि उपमुख्यमंत्री शिंदे यांनी घ्यावी. या प्रकरणापुरता फडणवीस आणि शिंदे यांच्यावर मला विश्वास आहे, असेही जरांगे पाटील म्हटले. </p>
<h2>माझ्यावर हल्ल्याचं षडयंत्र</h2>
<p>मुख्यमंत्री आणि उपमुख्यमंत्र्यांची लोकं माझ्यावर हल्ल्याच्या तयारीत आहेत, असा खळबळजनक दावा मनोज जरांगे यांनी केला आहे. माझ्या घरावर हल्ला होऊ शकतो, मला मारून टाकण्याचे षडयंत्र रचले जात असल्याचंही त्यांनी म्हटलं. सरकारने माझी स्कॉटिंग काढली, दसरा मेळाव्याला शेवटपर्यंत पोलिसांची स्कॉटिंग दिली नाही.</p>
<p>दरम्यान, ती क्लिप ओरिजनल सर्वांनाच त्याची खात्री आहे, असे म्हणत ती क्लिप एआय जनरेटेड असल्याचा आरोप करणाऱ्यांनाही जरांगे पाटलांनी फटकारलं आहे. तसेच, नवनाथ बन यांच्या आरोपावरही जरांगे पाटलांनी पलटवार केला, 100 का कोटी होईना होते का? असा सवाल त्यांनी विचारला. </p>
6 days ago
2 
