<p><strong>MPSC Paper Leak: मुंबई :</strong> देशभरात खळबळ उडवून देणाऱ्या नीट परीक्षेच्या पेपरफुटीनंतर आता <a href="https://marathi.abplive.com/topic/MPSC">MPSC परीक्षेच्या (MPSC)</a> पेपर फुटीवरुन वादंग उठला आहे. याप्रकरणी, राजकीय नेतेही आक्रमक झाले असून आज विरोधी पक्षातील खासदारांनीही MPSC पेपर फुटीबाबत मुख्यमंत्री देवेंद्र फडणवीस यांच्याकडे कडक कारवाईची मागणी केली. त्यानंतर, याप्रकरणी कारवाईला वेग आला असून एमपीएससीच्या अवर सचिवांनाही अटक करण्यात आली आहे. मात्र, या <a href="https://marathi.abplive.com/topic/lovestory">पेपरफुटीत प्रेमाचा (Love story)</a> नवा अँगल समोर आला आहे. एमपीएससीच्या फूड आणि ड्रग्ज इन्स्पेक्टर विषयाचा पेपर नेमका कसा फुटला याची माहिती समोर आली आहे. </p>
<p>फूड इन्स्पेक्टरची MPSC परीक्षा देणाऱ्या ऋतुजा पाटील आणि गौरव पाटील यांच्यातील प्रेमप्रकरणामुळे पेपरफुटीचा प्रकार समोर आल्याची माहिती आहे. परीक्षार्थी ऋतुजा पाटीलच्या वडिलांनी एका दलालाकडून परीक्षेच्या दोन दिवस आधी पेपर फोडला होता, ऋतुजाचे वडील अमृत पाटील यांनी पेपर फोडण्यासाठी प्रवीण पाटील या दलालाची मदत घेतली होती. मात्र, ऋतुजाच्या हातात पेपर आल्यानंतर तिने प्रेमापोटी प्रियकर गौरव पाटीलालाही परीक्षेपूर्वीच पेपर दिला. त्यानंतर, MPSC ची या पदासाठीची परीक्षा झाली आणि या परीक्षेत ऋतुजा पाटील उत्तीर्ण होऊन फूड इन्स्पेक्टर पदासाठी पात्र झाली. मात्र, त्यानंतर ऋतुजा आणि गौरव पाटीलमध्ये मोठे वाद झाले. </p>
<p>ऋतुजा आणि गौरव यांच्यातील वादानंतर दोघांचे ब्रेकअप झाले, त्यामुळे गौरवने स्वत:च ऋतुजाविरोधात एमपीएसी आयोगाकडे तक्रार केली. मात्र, गौरव पाटीलने तक्रारीनंतर पुन्हा एमपीएससीकडे ईमेल करून मी मुद्दाम पेपरफुटीचा बनाव केला असेही कळवले. त्यामुळे, गौरवने आधी तक्रार केली आणि पुन्हा पलटी मारल्याचं पाहायला मिळालं. याप्रकरणी, पोलिसांकडून गौरव पाटीलला अटक करण्यात आली आहे, तर ऋतुजा पाटीलला नोटीस देण्यात आली आहे. अद्याप ऋतुजा पाटील हिला अटक करण्यात आलेली नाही. दरम्यान, पोलिसांनी आत्तापर्यंत MPSC पेपर फुटी प्रकरणावरुन एकूण 6 जणांना अटक केली आहे. </p>
<h2>MPSC चा पेपर रद्द, नव्याने परीक्षा</h2>
<p>अन्न,औषध प्रशासनातील औषध निरीक्षक, गट-ब पदासाठी <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a> लोकसेवा आयोगामार्फत घेण्यात आलेली संपूर्ण भरती प्रक्रिया रद्द करण्याचा निर्णय आयोगानं घेतला आहे. 22 मार्च 2026 च्या चाळणी परीक्षेत गैरप्रकार झाल्याच्या तक्रारीनंतर मुंबई पोलिसांच्या गुन्हे अन्वेषण शाखेच्या प्राथमिक चौकशीत एका उमेदवाराला प्रश्नसंच मिळाल्याचं आणि त्याचा लाभ झाल्याचं प्रथमदर्शनी निष्पन्न झालं आहे. त्यामुळे, आयोगानं ही भरती प्रक्रिया रद्द केली असून आता फेरपरीक्षा घेण्यात येणार आहे. संबंधित उमेदवारांना पुन्हा अर्ज करण्याची गरज नसून फेरपरीक्षेसाठी कोणतंच शुल्क आकारलं जाणार नाही. फेरपरीक्षेची तारीख स्वतंत्र प्रसिद्धिपत्रकाद्वारे जाहीर केली जाणार आहे. दरम्यान, प्रेमप्रकरणातून MPSC चा पेपर फुटल्याची विश्वसनीय सूत्रांची माहिती समोर आली आहे.</p>
<h2>अप्पर सचिवांसह 6 जणांना अटक</h2>
<p><a title="मुंबई" href="https://marathi.abplive.com/news/mumbai" data-type="interlinkingkeywords">मुंबई</a> गुन्हे शाखेने बुधवारी याप्रकरणात मोठी कारवाई केली आहे. गुन्हे शाखेने एमपीएससीच्या (MPSC) तीन अधिकाऱ्यांसह सहा जणांना अटक केली आहे. औषध निरीक्षक पेपरफुटीप्रकरणात एमपीएससीचे अप्पर सचिव अभिजीत लेंडवे यांना अटक करण्यात आली आहे. </p>
<h2>परीक्षा उत्तीर्ण 488 पात्र उमेदवाारांची यादीही जाहीर</h2>
<p>22 मार्च, 2026 रोजी ही चाळणी परीक्षा ऑफलाईन पद्धतीने राज्यातील 6 विभागीय मुख्यालयाच्या ठिकाणी परीक्षा केंद्रांवर घेण्यात आली. सदर परीक्षेचा दिनांक 12 जून, 2026 रोजी निकाल जाहीर करण्यात आला. चाळणी परीक्षेअंती मुलाखतीकरिता 506 इतके उमेदवार पात्र ठरले. यापैकी 488 उमेदवारांच्या मुलाखती दिनांक 01 जुलै, 2026 ते 22 जुलै 2026 या कालावधीत घेण्यात आल्या. दिनांक 22 जुलै,2026 रोजी सायंकाळी मुलाखती संपल्यानंतर औषध निरीक्षक पदाकरिता पात्र ठरणाऱ्या 485 व अपात्र 03 अशा एकूण 488 उमेदवारांची तात्पुरती सर्वसाधारण गुणवत्ता यादी आयोगाच्या संकेतस्थळावर प्रसिद्ध करण्यात आली. </p>
<h2>हेही वाचा</h2>
<p class="abp-article-title"><a href="https://marathi.abplive.com/crime/mpsc-paper-leaked-due-to-love-affair-mpsc-fda-drug-inspector-group-b-exam-2026-marathi-news-1436874">प्रेमप्रकरणातून MPSC चा पेपर फुटला; पेपरफुटीच्या लव्हस्टोरीने यंत्रणा चक्रावली!</a></p>
2 months ago
5 
