<p><strong>Nitesh Karale Nagpur MLC Election Result 2026:</strong> गेल्या 30 तासांहून अधिक काळ सुरु असलेली <a title="नाशिक" href="https://marathi.abplive.com/topic/nashik" data-type="interlinkingkeywords">नाशिक</a> पदवीधर मतदारसंघाची मतमोजणी अंतिम टप्प्यात आहे. काल सकाळी आठ वाजता मतमोजणीच्या प्रकियेला सुरुवात झाली होती. मात्र, मतपत्रिकांची विभागणी होऊन प्रत्यक्ष मोजणी सुरु व्हायला दुपारचे चार वाजले होते. यानंतर पहिल्या फेरीच्या मतमोजणीत काँग्रेसच्या अभिजीत वंजारी यांनी आघाडी घेतली होती. मात्र, बुधवारी पहाटेपर्यंत दुसऱ्या फेरीची मतमोजणी आटोपल्यानंतर भाजपच्या सुधाकर कोहळे यांनी आघाडी घेतली होती. परंतु, कोणत्याही उमेदवाराला पहिल्या पसंतीच्या मतांचा निर्धारित कोटा गाठता न आल्याने दुसऱ्या पसंतीच्या मतांची मोजणी सकाळपासून सुरु होती. त्यामध्ये आतापर्यंत आतापर्यंत भाजपच्या सुधाकर कोहळे (Sudhakar Kohale) यांना 61,215, काँग्रेसच्या अभिजीत वंजारी यांना 57,052 मते मिळाली आहेत. सुधाकर कोहळे हे सध्या 4,163 मतांनी आघाडीवर आहेत. मात्र, या निवडणुकीत तिसऱ्या क्रमांकावर राहिलेल्या नितेश कराळे यांनी पहिल्या पसंतीची लक्षणीय मते मिळवली आहेत. त्यांना 24,249 मतं पडली आहेत. अनेकजण नितेश कराळे (Nitesh Karale) यांच्या या कामगिरीचे कौतुक करत आहेत. या पार्श्वभूमीवर आता शरद पवार गटाकडून पहिली प्रतिक्रिया आली आहे. शरद पवार गटाच्या नेत्या विद्या चव्हाण यांनी नितेश कराळे यांच्याबाबत भाष्य केले आहे. (Nagpur VidhanParishad Election 2026) </p>
<p>अशी कोणाची पक्षातून हकालपट्टी होऊ नये आणि कार्यकर्त्यांनी देखील पक्षावर ही वेळ आणू नये, असे विद्या चव्हाण यांनी म्हटले. कराळे मास्तरांबाबत यापेक्षा जास्त बोलण्यास त्यांनी नकार दिला. नितेश कराळे (कराळे मास्तर) यांची मतदानाच्या काही तास आधी सहा वर्षांसाठी पक्षातून हकालपट्टी करण्यात आली होती. महाविकास आघाडीच्या अधिकृत उमेदवाराचा प्रचार करण्याऐवजी स्वतः निवडणूक लढवून पक्षशिस्तीचे उल्लंघन करणे आणि शरद पवार गटाचा आपल्याला पाठिंबा असल्याचा संभ्रम निर्माण केल्याचा ठपका त्यांच्यावर ठेवण्यात आला होता. पक्षाने हकालपट्टी केल्याचा निर्णय नितेश कराळे यांच्या जिव्हारी लागला होता. यानंतर त्यांनी सोशल मिडीयावर एक व्हिडीओ पोस्ट केला होता. यामध्ये नितेश कराळे अक्षरश: ढसाढसा रडले होते. मी पवार साहेबांचा सन्मान करतो. त्यांच्याकडून अनेक गोष्टी शिकलो. पण माझ्यावर करण्यात आलेली कारवाई मला चुकीची वाटते. सहा जिल्ह्यात मी एकटा पुरुन राहिलो म्हणून दबाव टाकून कारवाई करायची, असे नितेश कराळे यांनी म्हटले होते. </p>
<p>राष्ट्रवादी शरदचंद्र पवार गटाच्या पुण्यामधून हर्षदा जाधव आणि <a title="छत्रपती संभाजीनगर" href="https://marathi.abplive.com/news/chhatrapati-sambhaji-nagar" data-type="interlinkingkeywords">छत्रपती संभाजीनगर</a> मधून प्रतापसिंह पाटील हे विजयाच्या उंबरठ्यावर आहेत. यावर बोलताना शरद पवार गटाच्या नेत्या माजी खासदार विद्याताई चव्हाण म्हणाल्या खूप आनंदाची गोष्ट आहे. ज्यांना वाटत होते की, राष्ट्रवादी संपली, त्यांना आता लक्षात आलं असेल की, <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a>ामध्ये शरद पवारांच्या दबदबा आजही कायम आहे. ज्या ठिकाणी सुशिक्षित मतदान आहे त्या ठिकाणी अजूनही पवार साहेबावर विश्वास आजही कायम आहे, आणि निवडणूक आयोगाचा जो घोळ आहे त्याचाही परिणाम या निवडणुकीवर दिसला, असे विद्या चव्हाण यांनी म्हटले.</p>
<p><iframe title="YouTube video player" src="https://www.youtube.com/embed/g2MPJ0GFW3U?si=URu7aJ3YD_Q1yQwB" width="560" height="315" frameborder="0" allowfullscreen="allowfullscreen"></iframe></p>
<p><strong>आणखी वाचा</strong></p>
<p class="abp-article-title"><strong><a href="https://marathi.abplive.com/news/politics/nagpur-mlc-election-result-2026-bjp-sudhkar-kohale-voters-only-write-2-number-on-ballot-paper-3000-votes-invalid-nagpur-graduate-constituency-election-result-marathi-news-1443782">Nagpur MLC Election Result 2026: नागपूरमध्ये अवैध ठरलेल्या मतपत्रिका पाहताच सगळेच चक्रावले, 'त्या' अजब पॅटर्नमुळे भाजपच्या सुधाकर कोहळेंचा खेळ कसा विस्कटला?</a></strong></p>
<p><strong><a href="https://marathi.abplive.com/news/politics/nagpur-mlc-election-result-2026-latest-live-updates-nitesh-karale-take-25000-votes-sudhakar-kohale-abhijit-wanjari-nagpur-graduate-constituency-election-result-2026-marathi-news-1443769">Nagpur MLC Election Result 2026: कराळे मास्तरांच्या ओक्साबोक्सी रडण्याने वातावरण पालटलं, नागपूर पदवीधरचं सगळं गणितच बदललं, भाजपच्या सर्व्हेपेक्षाही पुढे निघाले, नेमकं काय घडलं?</a></strong></p>
2 days ago
4 
