<p><strong>Vivek Bhimanwar MPSC Protest Pune:</strong> गेल्या 12 दिवसांपासून सुरू असलेलं एमपीएससी विद्यार्थ्यांचं आंदोलन (MPSC Protest Pune) अखेर स्थगित करण्यात आलं आहे. विद्यार्थ्यांच्या प्रमुख मागण्यांवर निर्णय झाल्यानंतर आंदोलन मागे घेण्यात आलं. एमपीएससीचे अध्यक्ष विवेक भीमनवार (Vivek Bhimanwar) यांनी चौकशी पूर्ण होईपर्यंत आपण सक्तीच्या रजेवर जात असल्याचं ट्विट केलं. त्यानंतर आंदोलन स्थगित करण्याचा निर्णय घेण्यात आला. दरम्यान, या सगळ्या प्रकरणावार आता पहिल्यांदाच विवेक भीमनवार यांनी प्रतिक्रिया दिली आहे. </p>
<p>एमपीएससी पेपरफूट प्रकरणात राज्य सरकारने न्यायालयीन चौकशीची घोषणा केली आहे. मी माझ्या संपूर्ण आयुष्यात नैतिकतेला कायम प्राधान्य दिले. त्यामुळे ही चौकशी पूर्ण होईस्तोवर पदावर कार्यरत न राहता या कालावधीत रजेवर जाण्याचा निर्णय मी घेतला आहे.एमपीएससीची स्वायत्तता, विश्वसनीयता आणि विद्यार्थीहिताला कायम माझे प्राधान्य होते आणि यापुढेही असेल. जयहिंद...जय <a title="महाराष्ट्र" href="https://marathi.abplive.com/news/maharashtra" data-type="interlinkingkeywords">महाराष्ट्र</a>...., अशी प्रतिक्रिया विवेक भीमनवार यांनी दिली. दरम्यान, एमपीएससी विद्यार्थ्यांच्या आंदोलनाला यश मिळाल्यानंतर आंदोलनस्थळी विद्यार्थ्यांनी जोरदार जल्लोष केला. प्रमुख मागण्या मान्य झाल्यानंतर आंदोलन स्थगित करण्याचा निर्णय घेण्यात आला. यावेळी आंदोलक विद्यार्थ्यांनी आमदार रोहित पवार यांना खांद्यावर घेत जल्लोष केला. </p>
<h2>माजी न्यायमूर्ती दिलीप भोसले यांच्या अध्यक्षतेखाली उच्चस्तरीय चौकशी- (MPSC Protest Pune Marathi News)</h2>
<p>एमपीएससी परीक्षांमधील कथित पेपरफुटी प्रकरणांची चौकशी करण्यासाठी माजी न्यायमूर्ती दिलीप भोसले यांच्या अध्यक्षतेखाली उच्चस्तरीय चौकशी आयोग स्थापन करण्यात येणार आहे. या आयोगाच्या सचिवपदी तुकाराम मुंढे (Tukaram Mundhe) यांची नियुक्ती करण्यात आली आहे. याशिवाय आंदोलनादरम्यान विद्यार्थ्यांवर दाखल करण्यात आलेले गुन्हे मागे घेण्याबाबत निर्णय घेण्यात आला आहे. तसेच 2027 मधील गट-क परीक्षेतील पदसंख्या दुप्पट करण्याची मागणीही मान्य करण्यात आली आहे. गेल्या 12 दिवसांपासून सुरू असलेल्या या आंदोलनात विद्यार्थी आपल्या मागण्यांवर ठाम होते. अखेर महत्त्वाच्या मागण्यांवर निर्णय झाल्यानंतर आंदोलन स्थगित करण्यात आलं. आता चौकशी आयोगाच्या कामकाजाकडे आणि सरकारकडून घेतलेल्या निर्णयांच्या अंमलबजावणीकडे विद्यार्थ्यांचं लक्ष लागलं आहे. (MPSC Protest Pune Marathi News)</p>
<h2>रोहित पवारांची विद्यार्थ्यांची समजूत काढताना मोठी कसरत- (Rohit Pawar MPSC Protest)</h2>
<p>दरम्यान एमपीएससी विद्यार्थ्यांच्या आंदोलनादरम्यान आमदार रोहित पवार यांना आंदोलक विद्यार्थ्यांची समजूत काढण्यासाठी मोठी कसरत करावी लागली. आंदोलन मागे घेण्याबाबत रोहित पवार आग्रही दिसत असताना, विद्यार्थी मात्र एमपीएससी अध्यक्ष विवेक भीमनवार यांच्या राजीनाम्याच्या मागणीवर ठाम होते. राजीनामा घेतल्याशिवाय आंदोलन मागे घेणार नसल्याची भूमिका विद्यार्थ्यांनी घेतल्याने आंदोलनस्थळी पेच निर्माण झाला होता. अखेर चौकशी पूर्ण होईपर्यंत विवेक भीमनवार यांना सक्तीच्या रजेवर पाठवण्याचा निर्णय जाहीर करण्यात आला.या निर्णयानंतर विद्यार्थ्यांनी आंदोलन स्थगित करण्याचा निर्णय घेतला.</p>
<h2>एमपीएससी विद्यार्थ्यांच्या प्रमुख मागण्या मान्य, आंदोलन अखेर स्थगित, VIDEO:</h2>
<p><iframe title="YouTube video player" src="https://www.youtube.com/embed/pTUppvmtwEQ?si=IsOEUJFdmgbg4ivt" width="560" height="315" frameborder="0" allowfullscreen="allowfullscreen"></iframe></p>
<h2>संबंधित बातमी:</h2>
<p class="abp-article-title"><strong><a href="https://marathi.abplive.com/news/pune/mpsc-protest-pune-news-success-for-the-mpsc-student-protest-in-pune-the-government-has-sent-mpsc-chairman-vivek-bhimanwar-on-compulsory-leave-1442077">सरकारचा मोठा निर्णय, MPSC चे अध्यक्ष विवेक भीमनवारांना पाठवलं सक्तीच्या रजेवर, विद्यार्थ्यांच्या आंदोलनाला मोठं यश</a></strong></p>
2 weeks ago
2 
